சூப்பர் சிக்ஸ்

தமிழ்மணத்தில் 'எனக்கு பிடித்த/பிடிக்காத ஆறு' என்று அனேக வலைப்பதிவர்கள் பதிவிட்டு கலக்கி வந்ததை யாரும் மறந்திருக்கமாட்டீர்கள். இப்போது அதே வரிசையில் இன்னொருவர் இணைந்திருக்கிறார். ஆனால் இவர் வலைப்பதிவரும் இல்லை. இவர் பதிந்திருப்பது தமிழ் வலைப்பதிவும் இல்லை.

அவர் தெ.ஆ-வின் நம்பிக்கை நாயகன் கிப்ஸ். அவர் செய்திருக்கும் சாதனை ஒரே ஓவரில் ஆறு 'ஆறு'கள். என்னதான் சொதப்பல் அணிக்கு எதிரான ஒரு சாதனை என்றாலும் கிரிக்கெட் விளையாடுபவர்களுத்தான் தெரியும் அது எத்தனை கடினமான சாதனை என்று. ஒரு சிறுபிள்ளையை பந்து வீச செய்து (அது ரப்பர் பந்தோ ப்ளாஸ்டிக் பந்தோ எதுவாயினும்) நீங்களும் தொடர்ந்து ஆறு சிக்ஸ் அடிக்க முயன்று பாருங்கள். நாக்கு வெளியே தள்ளிடும். அத்தனை கடினம் தொடர்ந்து ஆறு சிக்ஸ் அடிப்பது. டைமிங் கிடைப்பது அவ்வளவு எளிதல்ல. என்னுடைய கண்ணோட்டத்தில் இச்சாதனை சிறிய அணிக்கு எதிரானதென்றாலும் ஒரு இமயமே. பாராட்டுக்கள் கிப்ஸ்!

உங்கள் பார்வைக்கு கிப்ஸின் ஆறு வீடியோ கீழெ:

தே.ஆ அணி கோப்பையை வெல்லாது

அப்படின்னு நான் சொல்லலங்க. சொன்னவர்கள் விபரம் கீழே. :)

நடக்க இருக்கின்ற உலகக் கோப்பை வெல்லும் வாய்ப்பு தெ.ஆ அணிக்கு இல்லை என்று இரண்டு முன்னால் கிரிக்கெட் வீரர்கள் தெரிவித்துள்ளனர். யார் யார் தெரியுமா? ஒன்று ஷேன் வார்னே. மற்றொன்று ரனதுங்க.

நேற்று ஒரு செய்தி நிறுவனத்திற்கு அளித்த பேட்டியில் ஷேன் வார்னே கூறியதாவது:

ஆஸ்திரேலியா இம்முறை உலகக் கோப்பையை வெல்வதற்கு தெ.ஆ விட நியுசிலாந்து மற்றும் இலங்கை அணிகளே தடையாக இருக்கும்.

என்னதான் உலகில் முதல் நிலை அணியாக தெ.ஆ இருந்தாலும் கோப்பையை வெல்லும் அளவிற்கு மிகச் சிறந்த அணியாக இல்லை.

என பேட்டியின் போது தெரிவித்துள்ளார். இது தெ.ஆ மனச்சோர்வடையச் செய்யும் ஒருவகை பயமுறுத்தல் என நான் எண்ணியிருந்த போது ரனதுங்கவும் இது போல தெரிவித்த செய்தியை வாசிக்க நேரிட்டது. ரனதுங்க அறிவித்ததாவது:

இந்த முறை உலகக் கோப்பைக்கான டாப் நான்கு அணிகளாக ஆஸ்திரேலியா, இந்தியா, இலங்கை மற்றும் நியுசிலாந்து தேர்வு பெறும்.

இதில் இந்தியாவிற்கு உலகக் கோப்பையை வெல்லும் வாய்ப்பு மிகவும் கூடுதல். அவர்களின் பேட்டிங் மிகவும் பலமானதாக இருக்கிறது. தற்போதய இந்திய அணி கோப்பையை வென்ற எனது அணி (1996) போலவே எனக்கு தோற்றமளிக்கிறது.

இதில் தெ.ஆ-வை நான் ஒதுக்க காரணம், அவர்கள் பெரிய போட்டிகளில் தடுமாறும் மனநிலை உள்ளவர்கள். அதற்கு பல உலகக் கோப்பை போட்டிகளே சான்று.

என ரனதுங்காவும் தெ.ஆ அணிக்கு கோப்பை கிடைக்காது என்று மறைமுகமாக தெரிவித்துள்ளார். அவர்கள் பெரும்பாலும் சாடுவது பெரிய போட்டிகள் என்றாலே தொடை நடுங்கும் தெ.ஆ வின் குணத்தைத்தான்.

தெ.ஆ அணியினருக்கு இது இந்நேரம் காதில் விழுந்திருக்கும். இலங்கை மற்றும் ஆஸ்திரேலிய அணிகளுக்கு இருக்கிறது ஆப்பு. :)

ஸைமண்ட்ஸ் ?

ஸைமண்ட்ஸ் காயம்:
ஆஸ்திரேலிய அணியின் நட்சத்திர ஆல்-ரவுண்டர் ஆண்ட்ரூ ஸைமண்ட்ஸ் இங்கிலாந்துடன் நடந்த போட்டியின் போது காயமடைந்தார். அவருடைய தோள் பட்டையில் காயம் ஏற்பட்டது. காயம் பலமானதாகவே கருதுவதாக உடற்பயிற்சியாளர் தெரிவித்துள்ளார். அவருக்கு உடனே அறுவை சிகிச்சை அளிக்கப்பட்டுள்ளது.


உலகக் கோப்பைக்கு இன்னும் மூன்று வாரங்களே உள்ள நிலையில் அவர் உலகக் கோப்பையில் கலந்து கொள்ள முடியுமா என்பது சந்தேகமாக உள்ளது. ஆஸ்திரேலிய அணியின் கேப்டன் பாண்டிங் ஸைமண்ட்ஸ் விரைவில் குணமடந்தால் அணிக்கு நல்லது என தெரிவித்துள்ளார். ஸைமண்ட்ஸ் போன்ற அதிரடி ஆல்-ரவுண்டர் அணியில் இருப்பது எவ்வளவு பலம் என்பது பாண்டிங்-கிற்குத் தானே தெரியும். உலகக் கோப்பைக்கான அணி விபரம் பிப்ரவரி 13க்குள் ஐ.சி.சி யிடம் கொடுக்க வேண்டும் என்பது குறிப்பிடத்தக்கது.





=======================================================

ஆஸ்திரேலியா வெற்றி:


ஆஸ்திரேலியா மற்றும் நியூசிலாந்து அணிகளுக்கிடையே நடை பெற்ற நேற்றைய ஒரு நாள் போட்டியில் ஆஸ்திரேலிய அணி வழக்கம்போல் வெற்றி பெற்றது.

முதலில் பேட் செய்த நியூசிலாந்து அணி 50 ஓவர்களில் 290 ஓட்டங்களை எடுத்தது. பதிலளித்து ஆடிய ஆஸி அணி 48.2 ஓவர்களில் 291 ஓட்டங்களை எடுத்து 5 விக்கெட் வித்தியாசத்தில் வெற்றி பெற்றது. பாண்டிங் 104 ஓட்டங்களும், ஹாட்ஜ் 99 ஓட்டங்களும் எடுத்தனர். முழு ஸ்கோர் விபரம்.


===============================================

தெ.ஆ வெற்றி:

உலகக் கோப்பைக்கான ஆயத்த வேலைகளை தெ.ஆ அணியும் செவ்வனே செய்து வருகிறது. நேற்று பாக்கிஸ்தானுடன் நடைபெற்ற ஒரு நாள் போட்டியில் 164 ஓட்டங்கள் வித்தியாசத்தில் வெற்றி பெற்றது. பாக்கிஸ்தான் அணியினர் அதிர்ந்து போய் உள்ளனர்.

முதலில் பேட் செய்த தெ.ஆ 50 ஓவர்களில் 392/6 எடுத்தது. இதில் யாரும் சதம் அடிக்கவில்லை என்பது குறிப்பிடதக்கது. (இதுதான் அணித் திறமை). பின்பு ஆடிய பாக் - 46.4 ஓவர்களில் 228 ஓட்டங்களுக்கு ஆட்டமிழந்தது. முழு ஸ்கோர் விபரம்.